
نشر طبيب التغذية محمود عفيفي، طبيب شيرين عبد الوهاب، فيديو عبر حسابه بانستقرام، دافع من خلاله عن شيرين بعد ظهورها المقلق الأخير بوزن زائد، وطلب من الجمهور دعمها وعدم نشر التعليقات السلبية حولها.
طبيب شيرين عبد الوهاب يكشف عن مرورها بحالة نفسية سيئة
أوضح الطبيب أن الحالة النفسية السيئة تؤدي إلى ارتفاع هرمون الكورتيزول بشكل كبير، مما يسبب مقاومة للأنسولين وزيادة ملحوظة في الوزن، وخاصة في منطقة البطن، حتى مع الالتزام بالحمية الغذائية.
وقال طبيب شيرين عبد الوهاب في الفيديو: “يا جماعة من امبارح عمالين يبعتولي وبيسألوني على شيرين عبد الوهاب وحالتها الصحية، أنا بس عايز اطمنكم، الفنان ده انسان طبيعي زي اي حد في الدنيا، أنا بقالي فترة ما شفتهاش اكتر من شهرين ونص ما تابعناش مع بعض، بس اخر مرة كنت معاها كانت حالتها نفسية مش أحسن حاجة، وطبعا دي حاجة ليها اسباب تانية هي خاصة بيها هي يعني”.
وأضاف طبيب شيرين عبد الوهاب في تعليقه: “فطبيعي يا جماعة ان احنا ناس طبيعية، انا كنت ملتزم على دايت ماشي على نظام غذائي معين بعمل التعليمات كاملة، حالتي النفسية وحشة، طبعا الحالة النفسية يا جماعة عايز اقول لكم بتعلي هرمون الكورتيزول في السما، فبيجيلك.. اي حد عارف يعني ايه هرمون الكورتيزول، يعني مقاومة انسولين، يعني منطقة البطن بتزيد بشكل كبير جدا، يعني الوزن بيزيد على الهواء، لو بتشرب ميه كده هتلاقي وزنك بيزيد.. هي انسانة طبيعية خالص، يعني الفنان ده انسان مش مش كائن خيالي يعني زينا، حالتي المزاجية كويسة، مودي كويس، خلاص بعمل شغلي بعمل الدايت بتاعى بعمل رياضتي.. طبعا هي بقالها اكتر من شهرين ونص انا شخصيا مش عارف اوصل لها اصلا”.
وزاد طبيب شيرين عبد الوهاب من حالة القلق لدى الجمهور، خاصة بسبب تعليقه حول فقدان التواصل معها منذ أكثر من شهرين، وكذلك بسبب حديثه عن مرورها بأزمة نفسية في الفترة الحالية، ودافع عنها في نهاية حديثه قائلاً: “ارحموا الناس.. هو اي حاجة اي ترند وخلاص، هو لازم ابقى ترند حتي لو هتضايق به بشر، يا جماعة ارحموا من في الارض ارحموا من في السماء، اتقوا ربنا في الناس أياً كان مين أياً كان”.



