شيرين عبد الوهاب، فاجأت الجمهور بالخروج عن صمتها بعد فترة طويلة من الابتعاد والغياب المقلق، وتحدثت مع الإعلامي عمرو أديب في برنامج “الحكاية” عن رحلة عودتها الأخيرة.
تصريحات مؤثرة من شيرين عبد الوهاب عن رحلة عودتها
شيرين عبد الوهاب طمأنت الجمهور على حالتها الصحية والنفسية وقالت: “أنا بشتغل، والفترة اللي فاتت كانت زي عيل بيتولد من جديد، فمحتاج يبقى موجود في بيئة هادية مفيهاش أخبار.. أنا كنت زي في منتجع كده يعني، واتعالجت من حاجات كتير الحمد لله كانت تعباني وكانت مكسراني وكانت دابحاني.. بس أنا دلوقتي الحمد لله وبفضل رب العالمين وبفضل دعواتكم ليا، مافيش إنسان محظوظ قدي”.
وكشفت شيرين عبد الوهاب عن دور دعم جمهورها في عودتها مرة أخرى وقالت: “عندي جمهور ربنا يخليه ليا بيدعي لي كأني واحدة من بناتهم.. وأنا بقول لهم أنتوا دمي، أنتوا روحي، أنتوا كل حاجة حلوة بتوقفني على رجلي بعد سبحانه وتعالى.. أنا سعيدة أكتر منكم كلكم بأن أنا النهاردة هنام وأنا مش خايفة وأنا مش قلقانة ومتدفية بحب الناس”.
وشبهت شيرين عبد الوهاب رحلة عودتها مثل أحداث فيلم “تيتانيك”: “أنا جاية من المشهد العالمي اللي في فيلم تايتانيك، لما حد بيحط حد على لوح خشب كده ويموت هو، بس التاني بيفضل.. أنا جاية من هنا، ومسكت الصفارة وناديت على القارب اللي هيجي عشان ياخدني عشان أقول له إن أنا لسه عايزة أعيش وإن أنا لسه عايزة أنجح.. ده بالضبط الترجمة الحقيقية للي أنا جاية منه”.
وأضافت شيرين في تصريحاتها إن المقربين منها نصحوها بالانتظار في عودتها بسبب خوفهم عليها، وهو ما جعلها تشعر بالعند وتقرر العودة سريعاً، وقالت: “زي ما أنا هطلع.. أنا طالعة أغني للناس بروحي وبقلبي وبجسمي وبمشاعري وبكل حتة فيا.. أنا كنت حاسة إني سقعانة ولا زلت سقعانة بس أنا كويسة جداً نفسياً الحمد لله”.
وأشادت شيرين عبد الوهاب في تصريحاتها بفريق عمل أغنيتها الأخيرة “الحضن شوك”، خاصة بسبب دعمهم لها في الفترة الأخيرة على المستوى الفني والإنساني وعلى رأسهم عزيز الشافعي والموزع توما، وقالت عن سبب اختيارها هذه الأغنية للعودة بها: “الكلام ده أنا كنت عايزة أقوله عشان أقدر أكمل، لو ما قلتوش هيفضل جوايا كاسرني ودابحني.
ووصفت شيرين عبد الوهاب مشاعرها في لحظة الوقوف أمام الميكروفون بعد عودتها:”إيدي كانت متلجة جداً وكانت نبضات قلبي زيادة.. وقفت قدام المايك بغني ودني صفرت مش سامعة حاجة، بصيت لقيت نفسي بغمض عيني خالص وبغني الأغنية كلها وأنا مغمضة عينيا، عشان لما فتحت عينيا كانت فيه حاجة هتشتتني.. أنا دلوقتي حساسة جداً، لو قلت لي صباح الخير بصوت عالي ممكن أقعد طول اليوم أعيط.”
ووجهت الفنانة شيرين عبد الوهاب في تصريحاتها الأخيرة الشكر للعديد من الفنانين الذين ساندوها في الفترة الأخيرة وعلى رأسهم المطرب محمود الليثي وكذلك الفنانة هيفاء وهبي وزينة والفنان أحمد سعد، وقالت في تصريحاتها: “أحمد سعد صاحب عمري وأخويا.. وهيفاء وهبي قلبها طيب، كلمتني كأنها أخت بتسأل عليا بجد وعايزة تاخدني عندها.. وزينة ما سابتنيش خالص، كانت قايمة بأكبر دور وهو إنها كانت بترعى ولادي في البيت وكل حاجة”.
