شهد اليوم الأخير من تصوير مسلسل “المداح: أسطورة النهاية” العديد من اللحظات المؤثرة، والتي كشف عنها الفنان حمادة هلال في فيديو عبر حساباته بمواقع التواصل، ووثق بها كواليس تصوير الجزء السادس من المسلسل.
هكذا احتفل حمادة هلال بنهاية رحلة “المداح”
حمادة هلال استعرض جهود فريق عمل المسلسل خلف الكواليس، والصعوبات التي واجهت صناع المسلسل، وظهر وهو متأثر للغاية في احتفال نهاية تصوير المسلسل، وحبس دموعه تأثراً بعد نهاية رحلة مسلسل “المداح”.
وعلق الفنان حمادة هلال على الفيديو عبر حسابه بانستقرام وذكر: “ نهاية أسطورة النهاية، فركش المداح.. وعشان دايماً المداح مختلف، لازم كمان الفركش بتاعه يكون مختلف.. شكراً للعائلة الجميلة دي، فركش، و مدد يارب “.
وعلق العديد من النجوم على الفيديو أيضاً، والذين عبروا عن تأثرهم بنهاية تصوير المسلسل ووجهوا الدعم إلى حمادة هلال، ومنهم مي كساب والتي كتبت له: “:هتوحشنا يا صابر يا ناجح يا شاطر يا موهوب يا كبير ومستنين إبداع جديد وشخصية جديدة”.
ووجه الفنان حمادة هلال في رسالته الصوتية في الفيديو الشكر لفريق عمل المسلسل بعد انتهاء رحلة “المداح”، وقال: “فركش.. فركش كلمة كل اللوكيشن بيحب يسمعها بعد التعب والنجاح، بس المرة دي أنا بقولها وأنا زعلان، الكلمة خفيفة بس إحساسها تقيل قوي معايا، كل ما افتكر إن ده آخر يوم بجد بحزن وبتضايق، مش عشان المسلسل بيخلص أبداً.
لكن عشان رحلة جميلة.. صورنا في الحر وصورنا في البرد، في أيام كانت بتيجي علينا صعبة قوي قوي قوي، وأيام كانت الضحكة فيها مش بتسيبنا.. بقينا مش بس فريق عمل، بقينا عيلة.. العيلة دي كانت أقرب لنا من أي حد، كنا بنشوف بعض أكتر ما بنشوف بيوتنا وأهلنا، نصحى سوا ونتعب سوا ونفرح سوا بنجاح كل مشهد”.
وأضاف حمادة هلال في رسالته: “الحلم ده عمره ما كان هيكمل غير بالناس الحلوة الطيبة دي، بجد ناس اشتغلت بقلبها قبل إيديها، ناس يمكن الكاميرا ما جابتهمش بس هم كانوا السبب إن الصورة تطلع. ما كانش بطولة شخص، كانت بطولة عيلة كاملة.. رجالة الخدمات اللي كانوا دايماً أول ناس تحضر وآخر ناس تمشي، رجالة البوفيه المحترمين اللي كانوا بيدلعونا وبيعدوا علينا بكوباية الشاي في عز التعب ويسألوا أي حد ناقصك حاجة”.
