تصريحات هشام جمال عن علاقته بزوجته ليلى زاهر لاقت تأويلات عديدة من البعض على مواقع التواصل، وتلقى عدة انتقادات، ومنها بسبب مقاطعته لها في الحوار وكذلك بسبب تداول مقاطع من الحوار ظهر بها وهو يتحدث عن قراره بالزواج منها رغم وجود خيارات أخرى له، وكذلك مقطع آخر تحدث به عن غيرتها عليه في شهر العسل، بسبب مزاحه معها بتقديمها بأنها أخته وليس زوجته.
ليلى زاهر تدافع عن هشام جمال
قالت ليلى زاهر في بيانها: “بحترم وبقدر ردود الأفعال واهتمامكم بس حابة أوضح كام نقطة لأن في أجزاء من الحلقة اتقطعت واتاخدت بمعاني غلط، تصوير حلقة AB Talks حصل وأنا في أواخر شهور الحمل، قبل التصوير إدارة أعمالنا بلغت فريق البرنامج اننا هنوصل متأخر لاني تعبت شوية، ولما وصلنا اعتذرنا لأنس وفريق البرنامج بالكامل على التأخير، واحنا داخلين الستوديو قلت لهشام اني لسه تعبانه وطلبت منه يساعد أكثر في إدارة الحوار لأني كنت تعبانه ولأن طاقتي بشكل عام أقل الفترة دي وده شيء طبيعي”.
وأضافت ليلى زاهر في بيانها: “موقف السفر حصل فعلا ! لكن بعدها لوحده اتكلم معايا وقالي انه انتبه انه تصرف غلط بحكم طريقة نشأة شباب كتير وانه نوع تصرفات محتاج تصحيح وعلاج وده كان تكملة كلامه الموجود في الحلقة الكاملة.. والحقيقة أن من يومها محصلش موقف مشابه، وفكرة ان راجل ياخد باله ويحلل ويصارح بالمشكلة ويتغير عشانك هو اكيد شيء يحترم.. انا اخترتك! وانا كمان اخترته.. لان كثير من أسبابنا متشابهة..اكيد بحبه عشان طريقة تعامله معايا وكمان تعاملاته في حياته ومع الناس، واكيد عشان شايفاه الاحسن والانسب والاحلى في كل حاجة، وسبب ذكر الجملة دي في الحلقة هو نقاش عن الغيره، وانه كان بيأكدلي هو ليه عمره ما يشوف واحدة احسن مني، مش لانه بيشرح بطريقة متعالية زي ما الجزء اللي نزل كان بيتكتب عليه”.
وعبرت ليلى زاهر عن سعادتها في علاقتها مع هشام جمال وقالت: “علاقتي بهشام بدأت من ٤ سنين، وبقالنا حوالي سنة ونص متجوزين، وأنا أكثر واحدة عارفة تفاصيل علاقتنا وحياتنا واتفاقاتنا اللي بنحترمها وبتمشي علينا احنا الاتنين، لكن كمان انا عندي أمي وجدتين واخوات وصديقات قريبين مني جدا، كلهم سيدات بخبرات مختلفه شايفين علاقتنا من قريب وعايشين تفاصيل كتير منها، وكلهم بيحترموه وبيحبوه وبيدعولنا نكمل بنفس التفاهم اللي إحنا فيه، أنا بتكلم عن شخص من يوم فرحنا لحد النهارده كل ايامي معاه حلوة، بيعاملني بكل حب واحترام وتقدير، شخص من أول يوم في حملي مسابنيش في تعب، ولا سفر لشغلي، ولا زيارة دكتور، لأنه حاططني أولوية في حياته وقدر يحتويني بتغيرات مشاعري وأحاسيسي خلال تجربة جديدة علينا احنا الاثنين”.
وقالت ليلى زاهر في نهاية بيانها: “انا اقدر احكم على اللي انا عايشاه حاليا.. وهو اننا عدينا اول مرحله من الجواز بيتقال عليها من أصعب المراحل، بحب وتفاهم واتمنى نكمل كده واحسن ان شاء الله بعيدا عن التنبؤات المتشائمة المتأثرة بانتشار العلاقات السامة واللي هيلاقوا دائما زاويه تقلب او تحور اي شيء ايجابي لسلبي حتى الكلام اللي انا بكتبه دلوقتي، ربنا يكتب لكل حد السعادة والراحة في حياته بطريقته وإن شاء الله تشوفونا بعد سنين اكتر، ونكون مبسوطين ومتفاهمين اكثر وأقدر أنا كمان أخليه سعيد قد ما هو بيخليني مبسوطة في حياتي.. اخيرا هطلب دعواتكم لينا واحنا بنعيش واحدة من أسعد مراحل حياتنا وبنستعد نستقبل أول مولودة لينا ان شاء الله”.
