نشر المخرج محمد سامي رسالة مؤثرة عبر حسابه بانستقرام، والتي تذكر بها بدايات مسيرته في الإخراج، ووجه من خلالها رسالة مؤثرة إلى تامر حسني، بسبب دور الأخير الفارق في حياته الفنية.
محمد سامي: تامر حسني هو صاحب الفضل عليا
قال محمد سامي: “وَلَا تَنْسَوُا الْفَضْلَ بَيْنَكُمْ، وأنا قاعد إمبارح في التصوير افتكرت الرحلة والشقي والتعب من أول عمل لحد العمل اللي بصوره دلوقتي، وافتكرت صعوبة الحصول على فرصة عشان الواحد يثبت نفسه ويحقق أحلامه، فطبعا افتكرت أخويا وصاحبي الجدع الطيب الخلوق اللي دعمني من أول لحظة وكان سبب في اللي أنا فيه دلوقتي، تامر قدم لي كل الدعم والحب والامكانيات اللي خلتني اثبت نفسي”.
وتابع محمد سامي في رسالته: “بالذات في وقت كان صعب الشباب ياخد في الدراما فرصة بحجم مسلسل آدم، فاكر ان الكل كان رافض اني اخذ الفرصة دي ومستكبرينها عليا، إلا هو وقف في ضهري كأنه بيحارب لأخوه وبصلي مرة والظروف كلها ضدي وكنت حاسس وانا بحضر انهم هيجيبوا حد غيري، وقال لي ده مسلسلك وهتعمله وهتنجح وهتنجحنا معاك، حتي طريقته المتواضعة وهو بيقولي مسلسلك كأني عامل تسع مسلسلات قبله تحسس الواحد بنفسه وأهميته، أشهد أمام الله إنك طول عمرك متواضع ومؤدب وتطلب الحاجة باحترام، ومع الكرو محترم وعشان كدة كلنا روحنا فيك، بحبك يا صاحبي وتستاهل كل حاجة حلوة يا أجمل قلب، ويا رب يرزق كل الناس باللي يساعدهم علي تحقيق أحلامهم زي ما رزقني بتامر حسني”.
ورد الفنان تامر حسني على رسالة محمد سامي المؤثرة، وقال في رسالته في تعليقه على حساب محمد سامي على انستقرام: “يا سامي يا حبيبي يا ابن الناس الطيبين شكراً من كل قلبي على كل حرف خارج من قلبك كتبته في حقي، خلتني أدمع يا سمسم، أولاً أنا صدقت موهبتك من وانت صغير سناً لإنك فعلاً موهوب موهبة مش عادية، وتاريخ نجاحاتك يشهد بكده، كنت عارف وانا بقدمك إني بقدم مكسب حقيقي للصناعة ومن يوم ماسجلت رقمك على تليفوني وهو مكتوب سامي إبني، عشان كان إصراري على تقديمك كان بقلب أب مش صديق من سنك أب مصدق في إبنه وعارف إن الناس مش هيدوله فرصة يطلع عشان سنه صغير”.
وتابع تامر حسني في رسالته: “والحمدلله برحلتك ورحلتي اثبتنا للدنيا إنها مش بالسن لا، بالمجهود والتعب والشطارة والمذاكرة، وانت كل الصفات دي كانت فيك وانا لوحدي اللي عارف، عشان كده صممت إن الدنيا كلها تعرف معايا حجم موهبتك الحقيقي، حتى أعمالي اللي من إخراجك ليها مكانة خاصة في قلوب الناس، مسلسل آدم، فيلم أهواك، فيلم تصبح على خير..”.
واختتم الفنان تامر حسني رسالته إلى محمد سامي قائلاً: “ولسه إن شاء الله نجاحات جاية مستنيانا مع بعض، ربنا يوفقك يا حبيبي في كل شغلك اللي جاي وتكسر الدنيا وفي القمة زي عادتك.. يا محمد شكراً تاني على البوست الصادق ده شكراً يا أصيل يا محترم ، ربنا يخلينا دايماً لبعض ضهر وسند”.
