حرصت مي فاروق على الرد على تلك الانتقادات التي طالت حفل زفافها لأول مرة من خلال مداخلة هاتفية لبرنامج “الحكاية” مع الإعلامي عمرو أديب عبر شاشة MBC مصر، وأكدت مي فاروق على أنها لم تفعل شيئًا خاطئًا، وأنها تزوجت في العلن أمام الجميع.
مي فاروق تعلق على الانتقادات التي طالت حفل زفافها
قالت مي فاروق: “الحمد لله كان يوم حلو وكل الناس اللي كانت موجودة كانت جايه بحب وفرحة، كل الفنانين والناس وولادي كانوا فرحانين وكان يوم جميل لكن معرفش بعد كده إيه اللي حصل مش فاهمة”.
وعن مدى إمكانية أن يكون المتسبب في حالة الهجوم تلك يمكن أن يكونوا أعداء نجاح مي فاروق، ردت المطربة الشهيرة وقالت أنها لا تعلم ما إذا كان لديها أعداء أم لا، خاصة وأن كل من في حياتها يتمتعون بعلاقة طيبة معها، لافتة إلى أن إرضاء جميع الناس غاية لا تدرك، وتابعت: “أنا مبعملش حاجة عشان أرضي الناس كل اللي يهمني أرضي ربنا وأكون أم ولادي يفتخروا بيها طول الوقت وأعمل اللي ربنا قال لي عليه في الحلال”.
وأضافت مي فاروق: “ماليش دعوة الناس بتقول إيه ومعرفش هما بيعملوا كده ليه ولا بيقولوا كده ليه بس دي آرائهم وهما أحرار”، وعن فكرة تعرضها للحسد، قالت مي فاروق: “ليه ماقولش إني بتجوز قدام الدنيا كلها أنا طول عمري بحاول طول الوقت أعمل كل حاجة مظبوطة”.
واستطردت مي فاروق: “أنا أم لأولادي لوحدي ومسؤولة عن ولادي وشغلي بس يوم ما أقرر أتجوز أنا واحدة ست عايزة تتبسط وولادي يتبسطوا بيا ومعايا ونفرح ونعمل قدام الدنيا كلها إن أحنا بنعمل حاجة حلوة ترضي ربنا ومبسوطين إيه المشكلة إني عملت، يضايق الناس في إيه؟”.
مي فاروق علقت بسخرية كذلك على تحليلات البعض عن نظرة أبنائها لها في حفل الزفاف، فقالت: “الحاجة اللذيذة اللي بتفرج عليها أن الناس بدأت تحلل نظرة ابني ليا ونظرة بنتي ليا ويقولوا أكيد قلبها موجوع، وبعدين أنا محدش يعرف عن حياتي الشخصية حاجة.. وكل اللي حبيت أنهم يعرفوه إني اتجوزت لكن التفاصيل لأ، بس أنا أولادي نمرة واحد في حياتي وكل حاجة بتيجي بعدهم لو أولادي مش مبسوطين ومباركين وراضيين وهما اللي عايزين دا أنا مش هعمله”.
