مراد مكرم ضيف النجمة إسعاد يونس في برنامجها “صاحبة السعادة” المذاع على قناة “DMC”، وخلال الحلقة كشف عن سر خسارته لـ 24 كيلو من وزنه بدون عمليات.
مراد مكرم يكشف سر خسارة 24 كيلو من وزنه
قال مكرم في تصريحاته”أول حاجة قرار، والقرار خد سنين، يعني أنا كان جسمي حلو قبل ماتجوز بسنتين أو ثلاثة”، وأكمل مراد مكرم: “زدت شوية في الوزن قبل الجواز، ولكن بعد الجواز ومع العزومات مراتي عيلتها كبيرة واتعزمنا كتير، ومع أكل ماما لقيت نفسي ضربت جامد، لكن برنامج الأكيل زودني 8 أو 10 كيلو”.
وتابع: “ابتديت أدخل في مشاكل صحية، ومكنتش عارف ألعب مع ابني في طفولته، وكنت بلجأ لفكرة الأكل العاطفي سواء سعيد أو محبط بكافأ نفسي دائمًا بالأكل، وخدت وقت علشان أخرج من الدائرة المفرغة، فقولت أني مش هطلع همي في الأكل تاني، وجت فكرة الرجوع للجيم”.
واستطرد مراد: “أحنا بيت كله أكيلة ولكن أنا بداية تخني لما بطلت رياضة، أنا كنت بلعب رياضة 5 أيام في الأسبوع، وخلصت جامعة وبدأت الحياة العملية فبدأ يقل التدريب ويزيد الأكل”، مؤكدًا أنه لم يفكر في اللجوء إلى حلول سريعة مثل عمليات تكميم المعدة قائلًا: “في حاجة اتعلمتها من أهلي، إني ما لم أكن مضطرا مفيش داعي أدخل تحت مشرط دكتور”.
وأوضح مراد مكرم إلى أنه خسر وزنه على مرحلتين قائلًا: “أنا في الرياضة من 4 أو 5 شهور، لكن بدأت أخس قبلها، أنا خسيت توتال 24 كيلو، منهم 10 كيلو لأسباب مرضية وحقن من آثارها الجانبية إني إخس، ولما رجعت أتمرن ومع بعض نصائح المدرب في الأكل والحرق نزلت 14 كيلو”
