ملك زاهر شاركت الجمهور صورة لها داخل المستشفى، والتي كشفت من خلالها عن مرورها بأزمة صحية طارئة، ووجهت من خلال الصورة رسالة مؤثرة إلى الجمهور، والتي تحدثت بها عن الجانب الآخر من حياتها والذي لا يعرفه الجمهور، وذلك بعد تأثر حالتها النفسية بسبب الأزمة الصحية التي مرت بها مؤخراً، وذلك قبل أن تطمئن الجمهور على حالتها في نهاية رسالتها المطولة والمؤثرة.
حديث مؤثر من ملك زاهر عن حالتها النفسية
قالت الفنانة ملك زاهر في رسالتها: “طيب انا عمري ما كنت بنزل غير الحاجات اللذيذة أو الهزار او اي حاجة ايجابية من الاخر، ولما كنت بحب انزل حاجة سلبية كنت باخدها بهزار وبنزلها لأصدقائي المقربين وبهزر بيني وبين صحابي، بس بجد حاسة ان الفترة الاخيرة بيجيلي تعليقات كلها ما انتي عايشة ومبسوطة واحنا مش عايشين وايه كل الي انتو فيه”.
وأضافت ملك زاهر في رسالتها إلى الجمهور: “حاسة ان في الناس بصة علي اتفه الحاجات اللي ممكن تكون عندي، أو بتبسطني زي مثلا اني انزل اروح الجيم او اخرج مع صحابي أو يكون شكلي حلو وانا رايحة ايفينت معين، حبيت بس اقولكم ان الحياة مش وردي، انا بقالي ٣ ايام تعبانة شوية وعندي حاجة لحد دلوقتي مش فاهمين سببها وجت فجأة وفي حوالي نص ساعة قبلها كنت زي الفل ومن ساعتها مش عارفة انزل، او حد يشوفني بالي انا فيه ده، ونفسيتي وحشة اوي، انا بحكي الكلام ده عشان تعرفوا بس ان حياتي فيها الحلو والوحش والله زي اي حد بس انا بحب دايما اشير الحلو بس وغالبا ده غلط فا قررت اشارككم كمان الوحش”.
وكشفت ملك زاهر الهدف من وراء رسالتها الأخيرة وقالت: “ومع ان اللي بيحصلي دلوقتي انا بحمد ربنا عليه وعارفة انه بإذن الله هيكون حاجة بسيطة وان شاء الله هاخف وكله هيكون تمام بس هو مخلي نفسيتي وحشة أوي، والهدف من الستوري دي مش ان اي حد يقلق لأن الحمد الله انا كويسة وان شاء الله اللي عندي ده له حل، حقيقي كل الي طالباه انكم ما تحكموش علي حد من السوشيال ميديا او من ظهوره في اي حاجة لأنها بتوري بس يمكن ۲۰% من حياته، ووادعولي اخف بسرعة شكرا، وانا تمام مافيش حاجة مقلقة انا بس حسيت اني محتاجة اشارك الوحش زي ما بشارك الحلو مش اكتر”.
ولاقت ملك زاهر تضامن كبير من جمهورها بعد الكشف عن حالتها النفسية والصحية الصعبة مؤخراً، والتي جاءت بعد نشاط كبير لملك زاهر في الفترة الأخيرة، وظهورها المميز في العديد من المناسبات، ومن بينها حفل زفاف شقيقتها ليلى زاهر وكذلك رحلتها مع أسرتها إلى لبنان، بالإضافة إلى العديد من المناسبات الأخرى، وذلك قبل أن تكشف الجانب الآخر من حياتها بمرورها بأزمة صحية ونفسية طارئة مؤخراً.
