هالة صدقي، النجمة المصرية، تحدثت خلال تكريمها في مهرجان الأقصر للسينما الأفريقية، عن مأساة نجوم الفن، في محاولة منها لتغيير فكرة أنهم جميعاً ينعمون بالثروة والشهرة.
هالة صدقي تتحدث عن الجانب المأساوي في حياة النجوم
قالتهالة صدقي خلال حوارها: أحضر لمشروع بعيد عن الفن بعمل كافيه لأن الحكاية اختلفت، في صفحة اتقلبت جامد والحقيقة لما بيجيلي حد من أصحابي بيبقى عايز يدخل معهد التمثيل، بنصحهم إنه لا، لأن في صفحة اتقلبت لو ولادي هقولهم لا، لأن أنا مليش مستقبل ولا ضمان ولا تأمين ولا معاش.
وأضافت: لو أي فنان حصله أي حاجة في أي وقت خلاص اتركن وقعد، لو أي فنان عمل أي غلطة في حياته الناس بتقفل منه، الفنان عامل زي لعيب الكورة اللى لو اتخبط خبطة، حياته خلاص اتدمرت.
ثم تابعت: بشوف الناس الكبار القدام بتوعنا كلهم اتوفوا وهما معندهمش أي وسيط مادى، وأولادهم بتدور علشان حد يتكفل بيهم عشان صحتهم ومستشفياتهم، الحقيقة أنا بشفق جداً على كل زملائي، وكمان الفنان عنده عزة نفس وكرامة بعد ما كان نجم إزاى هيطلب مساعدة، أو هينزل يعمل إيه إيه، هينزل يعمل دور صغير.
واستكملت هالة صدقى: الفترة اللي فاتت الصفحة اللي اتقلبت علينا دي أنا ادعى إنى صديقتهم كلهم، في ناس كتير زملاء تعبانين ومبيشتغلوش وقاعدين في البيت، عندنا أهم الكتاب والمخرجين قاعدين في البيت، أنا مش ضد الشباب ولكن فين الكتاب الكبار، هيصرف على ولاده ونفسه إزاي، وأنصح أي فنان يعمل مشروع غير الفن.
