هادي الباجوري، المخرج المصري، أشار في تصريحات أخيرة أنه الوحيد الذي يتحمل المسؤولية الكاملة عن أي أخطاء في مسلسله الأخير “سفاح الجيزة”، وذلك رداً على حملة الأنتقادات التي واجهتها الفنانة الشابة داليا شوقي بسبب بعض مشاهدها في المسلسل.
هادي الباجوري: أنا المسؤول عن أي أخطاء في “سفاح الجيزة”
قال هادي خلال لقائه ببرنامج “تفاعلكم”: الجمهور بيحب يتفرج على اللي اتعود عليه، ولما بتدي له حاجة جديدة بياخد فترة علشان يتعود عليه، ليه باسم سمرة ميبقاش ظابط؟ علشان كان بيعمل أدوار بلطجي؟ وده مالوش دعوة بالموضوع والظابط في مصر اتعودنا عليه في المسلسلات إنه يكون له شكل معين زي أمير كرارة.
وتابع: أنا بحب أخرج عن المألوف، وباسم سمرة ممثل شاطر جداً وفي البداية الجمهور كان مخطوف منه وبعد فترة شافوه بيعمل الدور مظبوط، وأنا شايف إنه ممثل شاطر جداً أي دور هنديهوله هيعمله مظبوط.
ورد هادي الباجوري على الانتقادات الموجهة إلى الفنانة الشابة داليا شوقي قائلاً: الجمهور بتاعنا بيبقى ماسك كورباج شوية، يعنى داليا في أول 4 حلقات كانوا الناس طايرين بيها وشايلينها على دماغهم من فوق، ولما عملت مشهد حسوا إنها بالغت فيه مسكوا لها كورباج وسكاكين ودبحوها، مع إن إنت لو اكتشفتي إن جوزك اللي متجوزاه بقالك 4 سنين قاتل 9 وكمان خطف أختك وبيحبها، رد فعلك ممكن يكون أي حاجة.
وتابع: إحنا السوشيال ميديا عندنا بقت مبالغة وقاعدين للناس على الواحدة، ولو البنت بالغت شوية في المشهد فأنا اللي مسؤول عن ده وأنا اللي كان ممكن أقولها تهدى، وأنا كنت مقتنع بأدائها وأنا شايف إنها ممثلة شاطرة ومش هطلع أقول ده على السوشيال ميديا، وأنا آسف إني هقول ده ولكن الناس بقت تقول رأيها بشكل عنيف.
أضاف: أنا مبتأثرش أوي بآراء السوشيال ميديا، سواء كانت بالمدح أو لأ ومش بتابعها أوي، وأنا بقيم العمل من وجهة نظري أنا مبسوط منه ولا لأ أو فيه عيوب وببقى عارف من الأول إن ده اللي أنا راضي بيه، ومفيش عمل مفيش فيه آراء مختلفة ومقدرش أسأل الناس إنتوا كنتوا عايزينه ينتهي إزاي، ودي حاجة موجودة طول الوقت وفكرة إن يكون في آراء مختلفة دي حاجة صحية للعمل، ومستحيل نرضي كل الناس.
