خالد الصاوي، الفنان المصري، كشف خلال حواره مع الإعلامية لميس الحديدي ببرنامج “كلمة أخيرة”، عن الأسباب التي أثرت على قراره بتأخير الزواج والإنجاب، مؤكداً انه نادم على بعضها.
خالد الصاوي: اتجوزت متأخر علشان كنت غبي ومغرور
قال الصاوي في حواره: أنا اتجوزت متأخر وأنا عندي 48 سنة، كنت غبي ومغرور وكنت محوش ومستخسر نفسي، وكان لازم أتجوز مراتي من بدري وهي مالهاش مثيل، ومن أخطائي إني تأخرت في التفكير في الإنجاب، وكنت خايف فيروس C إللي عندي ينتقل لـ الأولاد لو خلفت.
وأضاف خالد الصاوي، معركتي مع الوقت كنت غبي أوي فيها، خسرت وقت كتير جدًا ونقطة الغباء اللي عندي عايز أقولها علشان أبقى مفيد، تخيلوا إللي عنده 40 سنة أصغر مني، وبقول للشباب خلوا بالكم علشان الصحة والفلوس، والوقت حاجات مش مطلقة، وهتبقى طول الوقت موجودة، والملذات هي الفخ ومتخليش الفخ ده يطير عمرك وصحتك وأحلامك، حاول تفرمل بدري.
وتحدث خالد الصاوي عن تجربته مع المرض قائلا: أنا كنت مريض بفيروس سي، وبعد ما دفعت دم قلبي في تكاليف العلاج بالخارج في الآخر تعالجت في بلدي، وأشكر وزارة الصحة المصرية وأطباء بلدي، والمشروع العظيم الذي قامت به الحكومة المصرية لعلاج مرضى فيروس سي، والتجربة أثبتت إن الأمراض المتوطنة يجب علاجها في بلدها.
واستكمل خالد الصاوي حديثه قائلا: تجربة المرض كانت مهينة في أولها وانتهت بالإيمان، لإني كنت مغروراً جداً وشايف نفسي إن صحتي تمام وقوي ومستقل برأيي، ودخول التجربة يخلي الواحد يحترم نفسه ويؤمن بربنا والقضاء والقدر والرضا، ويبدأ في إصلاح علاقته بالكون.
