عائشة بن أحمد، الفنانة التونسية تحدثت لأول مرة عن رأيها في فكرة الزواج، خلال لقائها في برنامج “ItsShowtime” المذاع عبر شاشة “CBC”، كذلك كشفت عائشة تفاصيل مسلسل مذكرات زوج وأنه التزم الحياد بين الرجل والمرأة.
لماذا تخاف عائشة بن أحمد من فكرة الزواج؟
قالت عائشة خلال اللقاء : “أكيد طبعاً الجواز مش حاجة سهلة خالص، هو محتاج مجهود وذكاء ومذاكرة ووعي، وكل حاجة وإلا الموضوع مش هيكمل، أو هيكمل بس مش هيبقى أحسن حاجة”.
وأضافت: “أنا بخاف، مش عارفة لما أتجوز ويبقى أنا وحد تاني مقفول علينا بيت هبقى عاملة إزاي، هكمل إزاي، فببقى خايفة، ببقى شايفة ده من بعيد من خلال صحابي، وفي حاجات بتطمن وفي حاجات مبتطمنش خالص، أنا بحس أنه محتاج مجهود من الطرفين”.
وفي نفس السياق كشفت عائشة بن أحمد تفاصيل مسلسل مذكرات زوج، قائلة: مسلسل مذكرات زوج محايد، ليس مع الرجل ولا الست، الرسالة أو الفكرة التي حاول المسلسل طرحها إن لازم يبقى فيه تواصل بين الزوج والزوجة طوال الوقت.
وتابعت: ولازم يبقى فيه ذكاء ووعي عشان العلاقة تكمل، فالكلمة الحلوة بتفرق وممكن تخلي العلاقة في سكة حلوة أوي، وأن العلاقة تكمل بعد 20، 30 سنة، هي محتاجة مجهود ومذاكرة.
وواصلت قائلة: وإحنا متعودين نشوف الست ضعيفة ومنكسرة لكن إحنا شوفناها في المسلسل زعلت في الأول وبعد كده فاقت لنفسها وعاشت حياتها وطورت من نفسها، وشوفنا الست القوية إزاي كملت وبقت أحلى.
