حسمت الدكتورة نيفين الكيلاني، وزيرة الثقافة المصرية النزاع بين الفنان علي الحجار، والمطرب مدحت صالح على مشروع إعادة تقديم تراث الغناء العربي، ورغم حسم النزاع الا ان على الحجار رفض الصُلح مؤكداً أن الخلاف أعمق مما يبدوا.
على الحجار يرفض الصلح مع مدحت صالح
قال الجار خلال مداخلة هاتفية ببرنامج “الستات”: مدحت صالح بالنسبة لي فنان كبير ومهم، وأنا بحب منه أغاني كتير.. لكن فكرة 100 سنة غنا بتاعتي وهو عارف.. وهو بيطلع في برامج كتير بيقول علي الحجار أستاذي.. لدرجة إن في مرة منى الشاذلي بتقولي تحب يطلع مدحت صالح معاك.. قولتلها آه طبعاً.. وطلعنا وقال قدام كل الناس إنه كان بيقعد ورا السور عشان يتعلم مني وإني أستاذه.
وأضاف علي الحجار: مدحت عارف مشروعي وعارف إن الدراسة اللي عملتها هو ناقله بالظبط.. وطلعت في مرة قولت ده مع هالة سرحان.. وأخد المشروع كوبي بيست.. ومن وجهة نظري المؤلف والملحن هما صانعي الأغنية والمغني هو مؤدي.. ياما مؤدي كويس أو مغني كويس أو مطرب.
وتابع علي الحجار: لما الدولة تهتم وتعرف إنه مشروع مهم.. بأرخ من سنة 1900.. ده مشروع قومي.. احنا مش اتنين عيال صغيرة في الشارع واتخانقنا مع بعض. وبتصالحونا مع بعض.. الموضوع مش كده.. مدحت صالح من أول ما طلع بيغني لنفسه 5 أو 6 أغاني.. والباقي أغاني لمؤلفين وملحنين تانيين دي مش حاجة جديدة.. واللي عمله في الحفلة.. هي حفلته اللي عملها قبل كده.. مفيش جديد.. وقال هطور الأغاني واعمل توزيع معاصر.. ومفيش حاجة حصلت زي ما كان بيعمل طول عمره في حفلاته العادية.
أضاف علي الحجار: أنا مسمعتش مدحت صالح بيقول إن المشروع بتاعه وإنه من دماغه.. نفسي يطلع يقول.. واللي حصل امبارح من الوزيرة أرضاني.. إن المشروع بتاعي يتحقق واعرف احققه بالشكل فعلاً الناس تفهم إن ده مشروع وإن دي دراسة ويفيد الدولة بجد.
واختتم علي الحجار حديثه، قائلاً: عايز مدحت صالح يتحرك ويطلع يتكلم ويبرأ نفسه من إنه أخد مشروعي.. وكلموني وقالولي إنهم كلموا مدحت صالح من أسبوع وبيقول هو علي الحجار ليه مكلمنيش ويقول ليه يا مدحت بتعمل كده؟ يا سلام يعني أنت واخد مشروعي وعايزني كمان أكلمك؟ إيه الجبروت ده؟ هو دايماً بيقول إن علي الحجار أستاذي يكلم أستاذه بقى.. ومنتساواش ببعض على فكرة.. محدش عنده 3000 أغنية محدش عمل 121 تتر مسلسل.. محدش عمل التنوع بتاعي.. مينفعش نقول انتو الاتنين.. أنا آسف والناس هتفهم ده غرور لكن أنا بتكلم في حقائق.. اللي حصل من الوزيرة امبارح ريحت قلبي جداً جداً وطمنتني إن المشروع هيتعمل صح.. اللي حصل قبل كده مكنش مشروع.
