لبلبة، النجمة المصرية، تحدثت في تصريحات تليفزيونية، عن مشاعرها لحظة تكريم الفنان عادل إمام، في حفل توزيع جوائز صناع الترفيه Joy Awards، الذي أقيم في المملكة العربية السعودية، مؤكدة أهميته وقيمته الفنية الكبيرة.
لبلبة عن عادل إمام: لما أشوفه أبقى حاسة إني شايفة الفن كله
قالت لبلبة في تصريحاتها: بكيت وقت تكريم عادل إمام، لأنهم جابوا مقتطفات من أعماله، والعينين دي عينين الأستاذ عادل، تضحك وتبكي، يديكي البؤس والغلبان والفرحان، هو فعلاً زعيم الفن وحبيبنا، عادل إمام ياخد قلبي، ولما أشوفه أبقى حاسة إني شايفة الفن كله.
وأضافت: أنا وعادل إمام عشرة طويلة وعملنا آخر مسلسلين صاحب السعادة ومأمون وشركاه، أنا بعتبر كل مسلسل منهما 5 أفلام، بنشتغل 7 شهور وكل يوم مع بعض وبناكل ونفكر ونمثل مع بعض، أنا عاشرت سينمائيين والأستاذ عادل إمام أكتر ما عشت مع أهلي في بيتي.
وأردفت لبلبة: العشرة بيني وبين عادل كبيرة وبحس بيه وبعينيه وإمتى هيقول إيه، لا يمكن أبوظ له إفيه، وهو عارف أنا بحبه قد إيه وبخاف عليه قد إيه، وبعرف هو زعلان ولا مبسوط من مشيته في الطرقة بتاعة الاستوديو.
أما عن النصيحة التي وجهها لها عادل إمام، فعلقت لبلبة، قائلة: وقت ما مرضت أمي ومرضها خد 16 سنة هو كان خايف عليا جداً، وكنا تقريباً حاسين أن مرضها صعب، فكان دايماً بيسأل هو وعائلته مدام هالة زوجته، ولما ماما اتوفت مبقتش أكل وخسيت، ويوم العزاء قعد جمبي وقالي كلي علشان خسيتي وبقى شكلك يقرف الكلب، وطبعاً أنا ضحكت هو دمه خفيف.
